Djali i të zhdukurit ka një kërkesë për Ramën: A mund ta pyesësh Vuçiçin se ku e kam babanë?

Në periudhën 28 shkurt-11 qershor 1999, shqiptarët e Kosovës përjetuan momentet më të vështira të shekujve të fundit në trojet e tyre.

Pas sulmeve të ushtrisë serbe në territorin dardan, u vranë rreth 15 mijë persona, 2.400 prej të cilëve luftëtarë të UÇK-s dhe pjesa tjetër qytetarë të thjeshtë, mes tyre edhe gra, fëmijë e të moshuar.

Po ashtu gjatë Luftës së Kosovës janë zhdukur më shumë se 5 mijë njerëz, ndërsa fati i shumicës prej tyre është zbardhur deri në vitin 2007, por i madh ka mbetur numri i rasteve ende të pasqaruara.

I prekur nga kjo luftë e pamëshirshme ka qenë edhe shqiptari i Kosovës, Arjanit Hoti, i cili humbi babanë dhe dy dajat e tij gjatë kësaj periudhe.

Përmes një postimi në rrjeti social, ai i ka bërë një kërkesë kryeministrit Edi Rama, ta pyesë presidentin serb, i cili asokohe ishte ministër i Propagandës, se ku ndodhet babai dhe dy dajat e tij.

Ai shkruan:

Zotni Edi Rama, a mund ta pyesësh mikun tuaj për Babain dhe dy Dajallarët e mi? Pytja është e thjeshtë, ku gjinden këta persona të zhdukur me daten 31.05.1998, në shtëpitë e tyre në Drenas apo atij i kujtohet si “Gllogovac”! Duke e ditë që ky miku juaj ishte pjesë e Qeverisë së Milloshoviqit, të lus ta pyesësh! Zotni Rama, Ne ende ndjejmë dhimbje nga lufta e fundit.”
Kujtojmë këtu se vizita në Tiranë e presidentit serb, Aleksandër Vuçiç, në kuadër të takimit të tretë të samitit të të ashtuquajturit “Minishengeni Ballkanik”, u shoqërua me reagime të shumta në mbarë opinionin publik, po ashtu u zhvilluan edhe dy protesta.

Shqiptarët e Kosovës reaguan ashpër ndaj sjelljes tejet “vëllazore” të Ramës ndaj Vuçiç dhe deklaratave të paprecedenta të tij ndaj liderëve të politikës kosovare, ku ofendoi rëndë kryeministrin e Kosovës, Ramush Haradinajn, duke e cilësuar si “gënjeshtar të madh” e “të paditur klasik”.

Madje në Kosovë ka patur edhe kërkesa që Rama të shpallej person “non-grata”.

Leave a Reply